" لحسة" من الطعم الحقيقي للرأسمالية

https://www.facebook.com/ahmad.syiam/posts/10151758777960715

مقال بالعامية المصرية :

يعني إيه "رأسمالية" ؟!

* " رأسمالية" يعني حضرتك تروح تشتري كيلو لبن معلب بـ8 جنيه ، مع إن الشركة شارياه من الفلاح بـ2.5 ، و الفلاح بيبعهولك إنت سايب بـ4 جنيه ،،

- يعني حضرتك دفعت ضعف ثمن السلعة ،، يعني إمكانياتك الشرائية في مقابل دخلك إنخفضت للنصف ، يعني حضرتك بقيت في نصف حجم الثراء اللي ممكن تكون عليه بنفس دخلك الحالي !!

دفعت الضعف الزيادة على نصفين تقريباً :

-نصف في مقابل مصاريف نقل الخام من الفلاح و نقل المنتج إلى الأسواق ، و مقابل مصاريف تشغيل المصنع و عماله ، و كمان مقابل الإعلانات اللي في التيليفزيون و اليافطة اللي فوق كوبري أكتوبر أم مليون جنيه في السنة دي !!

- و نصف كأرباح يتمتع به عائلة أو عائلتين من ملاك المصنع !!

- و النتيجة :

إن الفلاح خسر 1.5 جنيه لإنه باع للمصنع مش للمستهلك مباشرة ،،

حضرتك دفعت ضعف القيمة ،،

حوت أو إثنين من ملاك رؤوس الأموال الضخمة أكثروا أكثر ثراءاً و أكثر سيطرة على رقاب 5000 نفر من خلق الله اللي مشغلينهم بالسخرة بعقود عمل بيمضوا في نفس يوم إمضائها إستقالاتهم و شيكات على بياض علشان صاحب العمل يعمل فيهم ما بداله من غير ما يقولوا (بم) !!

- في حين لو كانت الدولة أقل رأسمالية و بتتخذ إجراءات لتحقيق العدالة الإجتماعية كانت دعمت مشاريع إنتاج ألبان صغيرة في 10،000 قرية في مصر ، كل مشروع يشغل 5 أفراد ،،

- و النتيجة كانت هتكون بإذن الله :

50،000 فرصة عمل في القرى بدل 5،000 في مدينة واحدة بيحاجوا هما نفسهم وسائل مواصلات للمصنع تحرق وقود و تعمل زحام ،

تنمية للقرية و الزراعة المصرية ،

إكتظاظ أقل بالمدن لأن المرور أخف و لأن الفلاحين مش هينزحوا عليها ،

حضرتك تشترى كيلو اللبن بـ4 جنيه بدل 8 ، الفلاح يبيع هو إنتاجه مصنع من غير ما يخسر 1.5 اللي خسرهم مع الشركة الكبيرة .

ده طبعاً غير الفايدة الكبيرة اللي هتتحقق من حفظ كرامة العمال ، إختفاء القطط السمان و أثرهم المدمر إجتماعياً ، إختفاء الإعلانات السخيفة على الكبارى اللي بتسبب حوادث ، و كمان إختفاء الإعلانات السخيفة في التيليفزيون اللي بتتسبب في قطع المسلسلات !!!

* "رأسمالية" يعني يبقى فيه 3 شركات للمحمول (مع إنها أصلاً خدمة سيادية المفروض ما يملكهاش أفراد و إلا يحصل زي مصايب التجسس اللي متهم فيها ساويرس) و الـ 3 شركات تحط أبراجها جنب بعض فتبقى فيه خسارتين :

- خطر بيئي بإن تأثير الموجات الضارة للأبراج هيتضاعف 3 مرات أو أكثر ، و طبعاً دي تبقى مصيبة في بلد زي عندنا المواطن فيها - لكثرة الملوثات - بيتلكك عشان يجيله سرطان !!

- و خسارة بإن لو إفترضنا إنهم كانوا شبكة واحدة كانوا قدروا بنفس عدد الأبراج الحالي يغطوا 3 أضعاف مساحة التغطية ، أو كانوا قدروا يغطوا مساحة التغطية الحالية فقط بـ 1-3 نفس عدد الأبراج !!

- النتيجة : خسارة صحية و إهدار 2-3 من إمكانيات أجهزة الإتصالات داخل الدولة !!

* "رأّسمالية" يعني حضرتك تدفع في الدواء تقريباً خمس أضعاف تكلفته !!

- بتدفع خمس في تكلفة الخامات و الأجور و النقل ،

- و خمس في التطوير و شراء براءات الإختراع بعشرات الملايين يقبضها أفراد قليلين ، الفراد دول الرأسمالية خلت العلم بالنسبة لهم مشروع تجاري بدل ما هو رحلة بحث لا تنتهي !!

- و خمس في جيب أصحاب الأسهم في الشركة اللي هما برضو ناس قليلين و ممكن يكونوا بيتكسبوا من مرضك و هما نايمين على بطونهم و بيشتروا أسهم شركة الأدوية أونلاين !!

- و خمس للصيدلي ، أيوه الصيدلي ده اللي النظام الرأسمالي خلاه يضيع 5 سنين في الكلية و حوالي من 20،000 إلى 200،000 جنيه من فلوس أهله - على حسب تعليم عام و لا خاص - علشان يقف في صيدلية يبيع مربى خرز البقر و صبغة شعر جارنييه و اللاسيكاة السحرية اللي بتزيل السموم من الجسم !!

- و خمس في الدعاية و الإعلان علشان يبقى فيه لكل شركة أسطول من السيارات و مندوبي المبيعات اللي شغلتهم يقنعوا الدكتور بالحق أو بالباطل (كذب أو رشوة) و بيقبضوا مرتبات أكبر من الدكتور اللي بيوصف الدواء !! الخمس ده كمان بيشمل الرشاوى التي تقدم للمسؤولين في وزارة الصحة لإجبارهم على إعتماد الدواء في البلد عموماً و تسعيره ، أو لإعتماد صرفه داخل منشآت وزارة الصحة و التأمين الصحي .

- يعني حضرتك (كمريض) بتدفع تمن رشوة الطبيب اللي كاتبلك الدواء و هوا يمكن يكون دواء غير ضروري أو حتى مضر !! متخيل حجم الإهانة ؟! إنت بتدفع تكلفة مؤامرة النصب عليك !!!

* أتمنى تكونوا خدتوا و لو "لحسة" من الطبخة الحمضانة للرأسمالية !!