الصورة مضافة بعد إستئذان مبدعها : د.محمد همام بركات
زميلي الطبيب رافض الإضراب الكلي:
ممكن تقولي حجتك إيه؟
* شايف الطب مهنة إنسانية؟
- ممكن
أسألك إيه الفرق بين "إنسانية" و "تطوعية"؟
اللي واقف بسلاح عالحدود ده برضه مهنته
إنسانية و مع ذلك بياخد أربع أضعاف مرتبك !
و الصيدلي مهنته إنسانية و مع ذلك محدش بيلومه لما ما يلاقيهوش موفر إنسولين
أو لبن أطفال و بيبيع شامبو و أدوية محروقة عشان بتكسب أكثر !
و في الطب نفسه محدش بيطالب أصحاب المستشفيات - سواءاً كانوا
أشخاص أو حكومة - إنهم يقبلوا مرضى من غير مقابل !
فليه سيادتك الوحيد اللي لازم يحاسب عالمشاريب ؟!
- طيب
يا صاحب المهنة الإنسانية تفتكر أهم
"للإنسان" إنه "يتعالج" و لا إنه "يأكل" ؟
بالتأكيد سد إحتياج الجوع أولى من علاج المرض ،،
و مع ذلك محدش بيطالب "أصحاب المطاعم" مثلاً إنهم يخربوا بيوتهم و يأكلوا كل الجوعى في الشوارع و
الملاجىء و عشش الصفيح !!
* يمكن حضرتك شايف إنك دينياً و أخلاقياً لا يمكنك أن
تتسبب في موت شخص يمكنك إنقاذه ؟
- طيب و إيه رأيك في اللي إنت بتموتهم إما بسبب إن
مفيش سرير رعاية بعد العملية فيموت في العنبر ،
أو اللي بتقتلهم بلقلة علمك و تدريبك فلا تجري
لهم جراحة ضرورية من الأساس و برضه يكون ذنبهم في رقبة تقصيرك ؟!
النوعين دول قتل يا صديقي ،، ده إسمه "القتل السلبي" لأنك ما زلت مسؤولاً أمام الله و القانون و الناس بكونك مازلت
تعمل في المنشئة الصحية ،،
نفس التهمة اللي بيتحاسب عليها مبارك لأنه لم يفعل
فعلاً "إيجابياً" من شأنه منع قتل المتظاهرين !
ده طبعاً غير "القتل الإيجابي" اللي بيحصل في كل مستشفى كل يوم إما بممارسة طبية خاطئة ، أو
بدواء فاسد ، أو بأدوات غير معقمة ، أو بإهمال في التمريض !!
لكن إنت لو أضربت عن العمل هتبقى بالظبط زي
الإنسان الضعيف اللي شاف بلطجية بيموتوا واحد ، لكن بدل ما يحوش عنه قام جري و بلغ
القسم اللي برضه ما جاش يحوش !
الإنسان الضعيف ده ربنا هيحاسبه على قدر إستطاعته
، و القانون مش هيجرمه ، و الناس نصهم هيزايد عليه و نصهم هيقول إن اللي عمله ده
عين العقل !
- ثم
إنت مين فهمك إن ربنا - بحكم أنه الخالق - سايب لجنابك "توكيل صيانة
الخلق" في الأرض ؟
أنت مجرد مهني ،،
زيك زي الميكانيكي ،، تفتح الورشة وقت ما ظروفك تسمح ، و تقفلها لو واقفة عليك بخسارة ، و مش مطلوب منك
تحيي الموتى و كل المفروض إنك تعمل اللي تعرفه
بأمانة !
- لو
كان ربنا أوكلك صيانة خلقه كان علمك إزاي ممكن عملية تغيير مفصل تتلوث في أنضف
غرفة عمليات مع أحسن جراح و تمريض و مضادات حيوية ،
في حين عملية زيها تعدي زي الفل في مستشفى في بير
السلم بأدوات تلمة و مصدية و متعقمة بغسيلها بسايديكس لمدة عشر دقايق في جردل ، و
مع متابعة و غيارات معفنة من الحلاق جار المريض !!
- لو
كنت فعلاً وكيل عن الخالق و مهنتك
"الإنسانية" لا يمكنك إيقافها حتى و لو سببت الضرر نفسك لكان من حقك - قانونياً و أخلاقياً - أن تفعل بالمريض ما تشاء
دون ان تطلب "إقرار موافقة" منه !!
- لو
كان ربنا أصلاً هيوكل الأمانة دي لحد كان هيوكلهالك إنت لمجرد منحه إياك بعض العلم
؟!
و لا هيكون موكلها لمن منحه الملك على الناس فأصبح في
يده تحديد ميزانية الإنفاق الصحي و السياسات العلاجية و حتى طريقة تعليم و تدريب
سيادتك ؟!
ليه شايل مسؤولية مش مسؤليتك و مصدر نفسك في وش الناس زي الشخص العبيط اللي
بيرضى إنه يشيل التهمة عن واحد ثري فيعترف على نفسه و يتحبس سنتين في مقابل كام ألف جنيه ؟!
تخيل بقى إنك أعبط منه لأنك بتصدر
نفسك من غير مقابل أصلاً !!
- ثم
مين قال إن إضراب شباب الأطباء سيقتل المرضى ؟!
يا صديقي لما جلالتك هتضرب إضراب كلي هيبقى لسه في
المهنة من يقوم بالدور فلا تقلق ،،
سيب إستشاريين الصحة و التأمين الصحي و أطباء الجيش و الشرطة و الجامعات و مستشفيات البترول يقومون بدورهم في
علاج الشعب الذي يدفع لهم أجوراً و إمتيازات يستكثرها عليك يا عزيزي يا من تمتلك
وزارة الصحة صك عبوديته !!
- متحطش
نفسك في مكانة أعلى من حقيقتك لمجرد أن ترضي غرورك ،،
و بعدين تلاقي المكانة دي بتلزمك بحاجات مستحيلة
،،
فتقعد مشتت أصارح نفسي و أسيبني من المكانة
الوهمية و أخسر غروري ؟
و لا أدمر حياتي و مستقبلي بالإلتزامات العجيبة
فأبقى رقصت على السلم لا مكانة حصلت و لا علم تعلمت و لا مال جمعت ؟!
* سيادتك شايف إن العقد شريعة المتعاقدين و لو مش
عاجبك قوانين و مرتبات الصحة تستقيل ؟!
آسف ،، الموضوع إختلط عندك ، العقد شريعة
المتعاقدين بين "الشركاء" أو بين "صاحب العمل و
العامل" ،،
لكن في تعاملك مع الحكومة يا صديقي فأنت تعاملها
على أنها "مدير أملاكك" ،، الحكومة لا تملك الصحة إنما تديرها لمصلحتك ، و علاقتك "كطبيب" مع الصحة هي علاقة
أكثر من مجرد "عامل" :
علاقتك بها "كمواطن" له إستحقاق في حياة
كريمة ،، بالإضافة لكونك "عامل" تعمل في مؤسساتها بمقابل و شروط معينة ،،
- فحتى
لو كنت وافقت طوعاً على شروط مجحفة للعمل في مستشفيات الصحة ،
فالعقد في أصله يجب أن يكون موضوعياً حتى يكون
ملزماً ،، من أسباب فسخ العقود فساد شروطها حتى و لو توافق عليها الطرفان.
و حتى - في ذلك
العقد الإفتراضي الفاسد بين الحكومة و طبيب الصحة - ليس كل الشروط محققاً ،،
و خصوصاً في بدلات مخاطر المهنة و إجراءات الوقاية من العدوى و من الإعتداء على المستشفى ،،
- و حتى
لو كانت كل الشروط مستوفاة فلا تنسى أنك مواطن من حقك أن تطالب بحياة كريمة مستحقة
،،
و من حقك كمواطن تمتلك وطنك أن تطالب بعدالة إجتماعية بينك و بين باقي
المواطنين ممن يحصلون على أجور أعلى بغير مسوغ ، و بينك و بين الأطباء الآخرين في
الهيئات ذات الطابع الخاص اللذين يحصلون على
أجر و إمتيازات و منح تدريبية أفضل !!
قد لا يكون من حقك أن تلوم مستشفى خاص على إنهاء خدمتك
بسبب حقيقي ،،
لكن من حقك أن تطالب الدولة صاحبة المستشفى
الحكومي الذي تعمل به بإعانة إعاقة أو إعانة بطالة في حال لم تتيسر لك إمكانيات العمل !
- أرجو
أن يكون الآن مفهوماً أن حجة "العقد شريعة
المتعاقدين" لا تنطبق على "المواطن
الطبيب" في علاقته بالحكومة التي هي فعلاً "مديرة المستشفى" لكنها كذلك "مديرة أملاك" ذلك المواطن الطبيب !!
* طيب يا صديقي رافض الإضراب الكلي مرهف الحس :
هل تعتقد أن إضرابك هو إنتصار للأغنياء المقتدرين على
الخدمة الصحية الخاصة ضد الفقراء المضطرين للخدمة الحكومية ؟!
- بنفس المبدأ يبقى حضرتك يجب أن تعتبر سفرك للخليج الثري لتحسين دخلك و تركك
لعلاج أبناء وطنك جريمة هو الآخر !
- من قال إنك مطالب بدفع فاتورة الصحة التي لم تشارك لا في تخطيطها و لا في إدارتها ، بينما المسؤولون يبتلعون ثلث ميزانية الأجور في ديوان وزارة
الصحة ؟!
- ثم
أصلاً من قال إن الفقراء لا يملكون ثمن العلاج ؟!
الفقراء مواطنون لهم حق في المال العام ،،
و إضراب حضرتك سيدفعهم إلى الذهاب إلى الحكومة "مدير أملاكهم" لإجباره على الدفع في مقابل علاجهم !!
حضرتك بدل ما تثور
بالنيابة عن الناس و تدفع لوحدك ثمن الثورة ، و بعدين تعالج الفقراء على حساب بيتك و صحتك ، و بعدين يضربوك في الإستقبال ،
بدل كل ده إضغط الناس شهر أو إثنين عشان يتعلموا
حقهم عند مين و يجيبوه إزاي !
- إضغط
خليهم هما كمان يضغطوا على الحكومة عشان تبني 20 مستشفى قروي بدل ما تستورد 20 مدرعة أمن مركزي
الواحدة
ثمنها 2 مليون جنيه كان ممكن ثمنها يوفر خدمة صحية لقرية كاملة !
إضغط
خليهم يجبروا الحكومة تدفع ثمن عشرة آلاف عملية
إستبدال صمام في القلب لأطفال الواحدة بتتكلف 15 ألف جنيه بدل ما تشتري عشرة آلاف زي مازينجر لجنود فض الشغب بنفس السعر !
إضغط
خليهم يجبروا الحكومة تصرف علاج شهري للسكر
لمليون مواطن بيتكلف الواحد شهرياً 250 جنيه بدل ما يشتروا بالفلوس دي مليون قنبلة غاز !!
* صديقي الطبيب :
الواجبات دوماً في إتزان مع الحقوق ،، و إنت
كمان بني آدم و ليك حقوق ،،
"فاللص" هو من يحصل على حقوق بدون دفع واجباته ،
و "العبيط"
هو من كانت ظروفه لا تحتمل التضحيات و مع ذلك يدفع
واجباته دون الحصول على حقوق فيودي بحياته و لا يستطيع إنقاذ الآخرين !
* إضراب كلي مستمر أو تجرعوا مهانة مستحقة،
لن تنجحوا حتى تفهموا أنكم "مهنيون" لا "وكلاء عن الخالق"،
لن تنجحوا حتى تفهموا أن الطبيب "إنسان" و ليس مقدر أقدار المرض
و الشفاء أو الموت و الحياة !!
_____________________
مقالات
أخرى حول الطب المصري الأسطوري و الطبيب المصري الخرافي :
أسطورة الطب في بلاد الجهل و مسرحية الطبيب الفذ في
بلاد الموت الرخيص !!
تكليف الأطباء حديثي التخرج بالمنطق النائية
دحض حجج رافضي الإضراب الكلي للأطباء كلمة السر إعرف
حجمك
ليست هناك تعليقات:
إرسال تعليق