إجمالي مرات مشاهدة الصفحة

موضوعات الكتابة على هذه المدونة

30 يونيو (17) أخطاء لغوية (2) أخلاقيات (24) إخوان (24) البرادعي (1) التجديد و المذهب الصيامي (12) السيسي (4) الشرق الأوسط (3) الطب في بلاد الجهالة (2) المذهب الصيامي (20) المفضلة (13) الهيمنة الأمريكية (5) تجديد إسلامي (6) تجديد صيامي (20) تحليل سياسي (67) تدوين و توثيق (16) تربية (5) تصحيح إجتماعي (49) ثقافة إشتباك (45) ثقافة ثورية (45) ثقافة ثورية رد أكاذيب السياسة (2) ثقافة حوار (7) ثورة فكرية (32) جماعات إسلامجية (25) حراك 25 يناير (9) خطايا مبارك (14) خواطر (10) دفع فساد زمن الفتن (42) رابعة (1) رد أكاذيب السياسة (44) رد أكاذيب بإسم الدين (25) رد فتن التاريخ (8) سفاهات العرب (6) سفاهة الديموقراطية (14) سوريا (5) شرح الديكتاتورية (6) ضلالات الخلافة (2) ضلالة وجوب الإحترام اللفظي الزائد (1) طرق تفكير (2) عن الإخوان خطايا و طبيعة (18) عن كرهي للقراءة الطائشة (2) فكر جديد (24) فلسفة (14) فلسفة طبية (1) فهارس المدونة (9) قانون و دستور (2) قصص قصيرة (3) لقاءاتي المتلفزة (4) مصائب العولمة (4) معلومات طبية (1) مقتطفات (4) نظم حكم (5) نقد السلفية (1) نقد العلمانية (1) وجوب الديكتاتورية (2) My articles in english (6)

الأحد، 24 مارس، 2013

اللي بنى مصر كان في الأصل إخواني! ثور على مصريتك العجوزة وإخلق مصريتك العصرية، وإظبط عقيدتك الثورية!







*بصراحة بقى المصريين أصلا كلهم إخوان،
وأعداء الإخوان من العواجيز علمانيين كارهين للإسلام أومغرضين!

مصدوم؟مستغرب؟و لا فرحان ؟!

إقرأ الكلام اللي جاي ده و إنت تفهم قصدي ، و أهو بالعامية كمان أهوه يعني مسمعكش تقول ده مقال طويل و بتاع :)
هوا بصراحة طويل بزيادة :)

________________________________

* مبدأياً بس تحسباً للفكاكة السلفية من عينة - أين الإنصاف و لماذا التعميم يا أخي - فأنا أنبه:
التعميم في "كل" اللي هتقراه معناه أن الحكم ينسحب على "معظم" المجموعة اللي بتكلم عنها مش "كلها" ،،
لما اقول المصريين يبقى قصدي أكثر من 90% من المصريين ،، لما أقول العواجيز يبقى قصدي أكثر من 90% من العواجيز ،،
فياريت الـ 10% ما يزعلوش مني و لا يفهموا إني قصدي "الجميع" ،، أنا قصدي بالتعميم "المعظم" و بس .

________________________________

* بتستغرب إنك شايف مديرك مؤيد للإخوان ؟! عمك ؟! أبوك ؟! حتى أخوك و زميلك اللي قريب من سنك ؟!
طيب مستعجب إزاي كثير من اللي عمرهم ما ركعوها بيأيدوا الإخوان ؟!

- طبعاً بتفتكر إن كل دول "إتأخونوا" صح ؟
طيب تفتكر الإخوان عندهم القدرة على الوصول لكل الناس دي و تطميعهم أو تخويفهم أو إقناعهم ؟!

- بتفتكر إن كل دول "عبيد حاكم" ؟! ده جزء كبير منهم لكن مش النسبة الأكبر ،،
النسبة الأكبر "إتأخونوا" لإنهم لقوا نفسهم راكبين بالمللي على تصرفات و تفكير الإخوان !!
جماعة الإخوان هي إنعكاس للفهم القشري للإسلام مخلوط بالطبيعة الزراعية لدلتا مصر ،،
تمام زي ما السلفية هي إنعكاس للفهم القشري للإسلام مخلوط بالطبيعة الصحراوية في نجد !!
- نجد هي الرياض و ما حولها في السعودية و منبع آل سعود.

________________________________

* و بما إن الطبع "المصري الأصيل" في الجيلين اللي فاتوا هوا فعلاً نسخة طبق الأصل من الطبع "الإخواني الأصيل" و اللي بنى مصر كان في الأصل إخواني في آخر 30 سنة بعد ثورة البترول ،،
فإذا العواجيز اللي هما المفروض "مصريين حتى النخاع" و مع ذلك بيعادوا الإخوان دول غالباً مش زي المعارضين الشباب اللي بيعارضوا عن فهم حضاري منفصل عن "الطبيعة المصرية المعاصرة المتأخونة" بطبعها !!
دول غالباً حاجة من إثنين :

- يا إما فعلاً كارهين للدين بحكم التعود أو التربية أو الأيدلوجية أيام السياسة و الجامعة في الستينات و السبعينات ،،
- يا إما أصحاب مشاكل مع "أشخاص" قيادات الإخوان ، عشان كده فاهمين إن الإخوان عمرهم ما هيشاركوهم و بالتالي هم داخلين معاهم صراع جديد على السلطة ،
أو بيكملوا صراع قديم من أيام ما كانوا زملاء في إتحاد طلبة كلياتهم و بياكلوا عيش على قفا شباب الثورة !!

________________________________

* مش مقتنع صح ؟ الراجل ده بيخرف و بيتفزلك مش كده ؟
طيب تعالى معايا واحدة واحدة نحسبها :

- يعني إيه "إخــــوان" ؟!
إخوان يعني ميكس من :

"التدين القشري"
من ألفاظ ، و مناسك ، و مظهريات شكلية ،، حاجات كده ماركة ( "الله أكبر و لله الحمد" مع إنه مثلاً بينسحب من الميدان بعد ما كان أعلن إنه هيعتصم !! ، الإلتزام بصلاة العيد مع إن محدش بيلمحهم في باقي الصلوات !! دقن "حسن بنا" كده لا هيا ماشية سنة و لا ماشية شياكة !! )

+

"نفاق الناس بالدين"
يعني كل حاجة بنعملها هي لنصرة الدين و لأجل خاطر الشريعة و الخلافة ، في حين إن أقصى علاقتهم الحقيقية بالدين اللي تزيد عن رجل الشارع هي عدم السب بألفاظ فاحشة و حفظ بعض القرآن !!

+

"النصب بإسم الدين"
لتحقيق مصلحة شخصية و هي "التمكين" أي الوصول للحكم ،، وشافه الكل في أكل الربا ، و منع الجهاد ، و مهادنة الأمريكان ، و علاقات الغرام مع اليهود و الشيعة لدرجة خرجت حتى السلفي المسحوب وراهم عن طوعهم !!

+

"جلدة تخينة" و "مهادنة و تحالف مع الحاكم الظالم"
و ده مثبت في خمس دورات سياسية في الثمانين سنة الأخيرة ،، هتلاقوها في الصورة دي :

+

"الوهم بالقدرات الخارقة" لنفسهم ،،
و تشوف ده ببوضوح شديد في فكاكة خيرت الشاطر ، و فزلكة صبحي صالح ، و صياعة البلتاجي مع إن التلاتة مستوى ذكائهم تحت المتوسط !!

+

"عنصرية" شديدة جداً للجماعة و لأفرادها ،،
و طبعاً دي مش محتاجة شرح :)

+

"تسلط" من القيادات على الأفراد بإسم طاعة ولي الأمر و بإسم الثقة في القيادات ،،
بمعنى أصح "خرفان" يعني عشان ما نحورش :)

+

"كذب و تدليس و تبرير" لأي حاجة بأي حجة ،،
يصرحوا و يقولوا ما قولناش ده تصريح فردي مع إنه على لسان المتحدث الرسمي بإسم الجماعة !!
يفشلوا في إدارة الدولة و يقولولك المعارضة هيا اللي بتختلق أزمة السولار !!
تكلمهم بإسم الثورة يقولولك الشرعية الدستورية ، تكلمهم بالقانون يقولولك إنت بتقدس قوانين مبارك !! لو كلمتهم بالدين و أحرجتهم يكلموك بالوطنية و العروبة ،، و لو كلمتهم إنت بالوطنية و العروبة يقولوا عليك ناصري عدو لدين الله !!

________________________________

- طيب تعلالي بقى نشوف المـــصريين يعني إيه ؟
المصريين يعني ميكس من :

"التدين القشري" من:
ألـفــاظ : لا تمت معانيها بصلة للمعنى اللي في نفس الشخص اللي بيقولها : (لا حول و لا قوة إلا بالله يقولها و هو في نفسه و عينيه بيقولك غور يا إبن الجزمة !! اللهم إني لا أسألك رد القضاء يقولها و هو بيزغر للسما و فاضله تكة و يكفر !! إن شاء الله يقولها و هوا مبتسم إبتسامة سخرية و بيقول في نفسه إبقى قابلني !!) ،
و مـــناسـك : حولت "العبادة" من "علاقة تقوى" إلى مجرد "عادات و تقاليد" ( يسيب الغيط كل أدان و يصلي الفرض و يصلي السنة و يعلي صوته قوي و هوا بيسبح في الركوع و السجود و ختام الصلاة بصوت بطىء متدرج لحد ما ينومك مغناطيسياً من كثر التدبر و الخشوع و لو بصيت على وشه تلاقي عينيه زايغة يمين و شمال و كمان أصلاً الغيط اللي هوا سايبه ده سارقه من ورث أخوه الصغير غصب و إقتدار !! يصوم في رمضان و يشقى طول النهار و يمكن كمان يصلي التراويح و بعدين يروح يسهر في خيمة رمضانية على ميلودي أو حتى رقاصة !! يتبرع بصدقة و يا إما يفرج خلق الله على اللي هوا إداهاله يا إما يحكيها كأهم قصة فيها عبرة و عظة لكل خلق الله اللي يقابلهم !!)
و مـظهريات شـكلية : كلها إما لتوصيل رسالة للناس أو حتى لتطمين النفس إن الواحد "بتاع ربنا" !! ،، ( "سبحة" حتى لو ما بيسبحش !! "كتب الكتاب في الجامع" حتى لو كان العريس و أبو العروسة عمرهم ما بيدخلوه للصلاة !! "نقرأ الفاتحة إن ربنا يوفقنا في المشروع" حتى و لو كان مشروع حرام أصلاً أو قايم بالربـا !! )
عشان كده تلاقي الناس أقرب للإخوان مع إنهم بيحترموا السلفيين أكثر و بيحبوا يسمعوهم !!
ده لإن الإسلام الإخواني حلو و سهل و عالمزاج كده و واكل مع المصريين ،، إنما الإسلام السلفي ده صعب على عموم المصريين اللي عايزين يمسكوا العصاية من النص : يعملوا فيها متدينين و مع ذلك برضه يمشوا بالمزاج و عالكيف كده من غير إلتزامات !!

+

"النفاق مع الناس بالدين"
يعني كل حاجة بنعملها نحشر فيها الدين : ( "يا أخي إعتبرها لله" حتى و لو بنتكلم على رشوة !! "إتجوزت على سنة الله و رسوله" حتى و لو كنا خالفنا الله و الرسول ميت مرة في الجوازة من أول المغالاة في المهر لحد الرقاصة العريانة في الفرح !! "يا أخي سامحه لوجه الله" حتى و هوا بيوسوسلك إنك تسيب خطاف شنط معروف و متسلموش للقسم !! ) ،،

+

"النصب بإسم الدين" :
("الحلف بالله" عمال على بطال في الحق و الباطل حتى لو عشان يبعلك ربطة فجل !! "دا راجل عارف ربنا و حامل القرآن" عشان يعمل فيها ديك البرابر اللي فك الإشتباك بينك و بين الخطيب المغفل اللي بيقول أي هتش في خطبة الجمعة !! "يا أخي ده قدر ربنا و ما تعرفش دي شالت عنك إيه" برضه و هوا عامل ديك البرابر اللي عمال يقنعك إنك ما تغرمش الحمار اللي خبطلك عربيتك و هيا راكنة !! ) ،،

+

"جلدة تخينة" و "مهادنة الحاكم الظالم" ،،
أظن "مهادنة الحاكم الظالم" دي مش محتاجة شرح مني ،، إقرأ أي كتاب تاريخ و شوف في السبعتلاف سنة اللي مصدعينا بيهم الشعب ثار كام مرة رغم إن تقريباً ما حكمناش حد عادل !!
و "الجلدة التخينة" هتشوفها لما المصري يتعامل مع الأقوى منه (بوليس ، صاحب الشغل ، الكفيل ، جار بلطجي) ،،
لكن هتشوف "جبروت الفرعون المصري" لما ربنا يريد و يوقع تحت إيده واحد أضعف منه (إبنه ، مرؤوسه ، مواطن جاي يقضي عنده خدمة في السجق المدني مثلاً ، أو عسكري وقع تحت إيد صف ظابط وارد غيطان المنوفية و لا الشرقية !! )

+

"الوهم بالقدرات الخارقة"
دي طبعاً هتلاقيها في صفتين لا يمكن لا إنكارهم و لا حتى إنك تعمل مش شايفهم في الشخصية المصرية :
صفة "الفـتي" ،، كل المصريين عارفين كل حاجة و عارفين الفولة و القرد مخبي إبنه فين !!
و صفة "إنت مش عارف إنت بتكلم مين" و دي بقى هسيبها بدون تعليق الحقيقة .

+

"عنصرية" شديدة جداً لمصر و للمصريين ،،
عنصرية بتتزرع في العيل أول ما يتكلم ، و بعدين في الحضانة ، و في المدرسة لدرجة إن الطفل بيتصور إن مصر دي هيا الدنيا و باقي الدول حاجة كده لزوم الديكور لكوكو الأرض اللي كانوا هيسموه مصر أصلاً لكن عملوا خاطر لزعل باقي القارات و كده فسموه الأرض بعد ما إستأذنوا الفراعنة !!
الواد بيفهموه تقريباً بالمحسوس كده إن الفراعنة أول ناس إستخدموا الإنترنت ، و إن الطفل المصري هو أذكى طفل في مجرة درب التبانة !!
لكن طبعاً هيا عنصرية "طق حنك" و بس ،، يعني لو القصة فيها لقمة عيش أو تهديد يبقى أشهد للسعودي زور ضد المصري لحسن الكفيل يقطع عيشي أو يسلمني للشرطة و المحكمة الشرعية تظبطني عالقبلة !!

+

"تسلط" من أي كبير على كل صغير و ليها مليون حجة ،،
من أول : ("بر الوالدين" اللي بيفسروه بالعبودية للوالدين ،، و "إحترام الكبير" حتى و لو سبلك الأب و القمع و لزقك على سداغك بعد ما خرشملك عربيتك فما يصحش ترد عليه !! وصولاً إل الجملة الخالدة "إعــتبره أبــوك يا أخــي" !! ) ،،

+

"كذب و تدليس و تبرير"
هوا صحيح إحنا مش أكذب شعوب الأرض لأن السعوديين هما المصنف رقم واحد على العالم ، لكن أعتقد إننا بننافس على أقل واجب على الثالث و الرابع :)
مين بيصدق مين النهاردة ؟ كل واحد بيعتبر اللي قدامه كذاب حتى يثبت العكس !! كل الناس بتكذب في كل لحظة إما بفتوى غلط مع إدعاء خبرة و عرفة ، أو نقل كلام ما إتقالش ، أو تهويل أو تقليل في وصف شخص أو حدث !!
كله بيدلس يا إما لتحقيق مصلحة زي بيع عربية متشقلطة على إنها البريمو ، أو للتجريح في منافس أو خصم ،، تقريباً مفتكرش نزاع كنت حكم فيه أو شاهد عليه إلتزم فيه الطرفين عدم ذكر كل الموبقات بالكذب في الطرف الآخر !!
و التبرير ده الحقيقة إحنا بنتهم الإخوان زوراً إن هما اللي إخترعوه ،، رغم إنهم فعلاً أكثر من بتستخدمه النهاردة ،، لكن التبرير ده صنعة مصرية أصيلة ،،
إسأل أي واحد على غلطة لحد بيحبه هتسمع قصائد تبرير مبربرة بالبرابير !!
و أخنق تبرير سمعته قريب كان من راكب قرر يركب الميكروباص واقف لأن مفيش كراسي فاضية و العربيات قليلة ، فزنق على راكبة كانت قاعدة ورايا ، فبقوله يعني دي طريقة حد يركب بيها و يدايق الناس ، فلما لاقاني بكلمه ناشف فبدل ما يظرفني كلمتين إهانة و كده قام جايب ورا و "مبررلي" ركوبته العجيبة دي بإن الست اللي قاعدة جنب الست اللي هوا زانق عليها لو كانت لمت الشنطة اللي على رجلها شوية كانت الست اللي هوا زانق عليها قدرت تروح شمال شوية و ما تخبطش فيه !!

________________________________

* طيب الهري اللي فوق ده كله أصلاً ليه ؟
إستعراض عضلات كتابية و فكاكة و كده ؟

لأ و ربنا ،، أنا بس عايز أوصل للشباب معنى واحد بس هوا إن :

(الثــــورة دي مــــلاكي شـــباب ثــــوري)

- و مش ثورة لكل الشعب و بالذات مش للعواجيز !!
لما ربنا يكرمكوا و تحكموا إبقوا أقيموا العدل بين كل الفئات اللي معاكوا و اللي ضدكوا ،،
لكن لحد ما ده يحصل نفسي حضراتكوا تبطلوا نغمة "التـوعية" و الفكس اللي من النوع ده ،،
فات سنتين ثورة و كل عيل و جاهل عارف إيه اللي بيحصل و مين بيعمل إيه ،، فأكيد اللي ما فهمش يا إما ما بيفهمش فعمره ما هيفهم ، يا إما البعيد قرر إنه يحط في مخه جزمة و يمشي ورا مزاجه مش ورا الحق !!

- ركزوا في قوتكم الحالية و نظموها و هيكلوها و دورولكوا على قيادة ،،
و إوعوا يضحكوا عليكوا و يقولولكوا إن القيادة دي "للمحنكين" اللي فوق الستين و النصباية دي ،،
مفيش حاكم في التاريخ عمل تغيير جذري للأفضل في بلده و كان بادىء حكمه و هوا فوق الستين !!
مفيش قائد ممكن يقود ثورة و هوا أصلاً مفيش في روحه و فكره أي نوع من الثورية !!
لو محكمتوش إنتوا بعد ثورتكوا هتبقوا "أضحوكة التاريخ" و مصيركم غالباً "القتل" أو في أحسن الأحوال "القرطسة" و العواجيز هيمشوها باللي هما شايفينه بدماغهم المتحجرة من تصلب الشرايين !!

________________________________

* و تاخدوا بالكوا في خلال رحلة الشقا الثوري دي من 3 نقط :

1 - الثورة دي ثورة جيل - إتنور بالتواصل مع العالم و بشكل أجود من التعليم - على جيلين خربوا البلد بجريمتين : تحقير قيمة العلم و عبادة كل فرعون حكم مصر ،،
عشان كده إوعى تحط أمل على العواجيز ،، أياً كانوا أئمنلك إنساهم ،، الجيلين اللي قبلنا دول بيتهيألي مفيش فيهم أكثر من عشرة عشرين نفر هما اللي بيفكروا زي جيلنا و الباقي "مصري قراري" !!

2 - النقطة الثانية هيا نفسها حكاية "مصري قراري" دي ،،

من كل الهري اللي فوق ده أنا حاولت أوصلك إن "الشخصية المصرية" الحالية هي أصل كل بلاوينا ،، و هيا شخصية الجيلين اللي إحنا بنثور على أشخاصهم و أفكارهم و آثار بلاوي أفعالهم ،،
فما تأخدكش العزة بالإثم و تنقح عليك الوطنية اللامنطقية و تقعد تردد الأناشيد اللي حفظهالك الجيلين دول إن "المصري ما يعملش كده" و "المصري طول عمره مش عارف إيه" ،،
حتى لو ناقح عليك الإنتماء قوي فأنا هحلهالك :

الإنتماء بيكون للوطن مش لطبع الآباء و الأجداد ،، صحيح هما بينتموا لمصر و إحنا بننتمي لمصر ، لكن "المصري" بتاعهم غير "المصري" بتاعنا ،،
إحنا بنعمل دورة حضارية جديدة ،، بنرمي القديم اللي فقرنا و جوعنا و عرنا قدام العالم عشان نعمل الجديد اللي نتمنى إنه يشرفنا و يخلينا لينا إسم بين دول العالم حضارياً و علمياً و إقتصادياً و عسكرياً ،،
و ده بالتأكيد عمره ما هيتم لو مشينا على نفس السكة المتخلفة اللي مشيوا هما عليها ،، و لا بنفس الأفكار و الأخلاقيات اللي كونتلهم الشخصيات المصرية اللي إحنا كارهينها دي مهما كان صنفها : إخواني نصاب ، سلفي رجعي ، ناصري متحجر ، فلاح كهين ، صعيدي مقفل ، بدوي دموي !!

3 - إظبط عقيدتك الثورية :

إعرف مين عدوك و مين حليفك و مين اللي مستني يشوف مين اللي هيكسب ،، و بناءاً عليه عامل الكل بالمعاملة اللي يستاهلها و اللي توفرك أكثر أمان و مكاسب !!
قسم أعداءك إلى أنواع على حسب : القوة ، الخطورة ، إمكانية التحييد ،، و بناءاً عليه إعرف هتواجه مين الأول و إزاي و مين اللي ممكن تطمعه أو تضحك عليه بسلام مؤقت !!
لاعب الكل لو تقدر ،، مش وطينة و لا حاجة إنك تتحالف مع اللي تشوفه في مصلحتك من غير ما تنسى أخلاقياتك ،، لبسهم في بعض بالحداقة تبقى واد كفاءة ، لكن إوعى تآمنلهم و لا تفتكر إن هما هيضحوا عشانك و لا هيضيعوا فرصة ياكلوك فيها لو يقدروا !!

________________________________

. الشرطة عدوك الأصلي اللي وجودهم أساساً كان لحفظ الظلم و قهر الشعب و هما أضافوا إبداعتهم النتنة على الخلطة دي ،،
لكنه عدو غبي و أهبل ممكن تنيمه في الدرة بمجرد إنك ما تخبطش فيه شوية للمدة اللي تناسبك إنت !!
عدو ضعيف لإنه أصلاً "كلب أي حاكم" ، و لأنه دلوقتي ملوش صاحب فمحدش باكي عليه ، و كمان ليه أعداء غيرك ، فلو ناصح فكك منه شوية .

________________________________

. العسكر رغم إن إيديهم متعاصة دم و جيوبهم مليانة حرام ، إلا إن ده ينطبق على مجموعة صغيرة في قيادة المنظومة من مجموعة منتفعين خونة ، هما مش كارهينك و مش شايفينك عدو لكن ممكن يقتلوك عشان مصالحهم عادي جداً ،،
دول مش عدو أصيل دول عدو مؤقت ، لو خلصت من الكام راس دول و كلابهم في قوات قمع الجيش هيرجعلك جيشك وطني زي ما إنت نفسك فيه ،
و متنساش إن دول رغم نتانتهم فدورهم لا غنى عنه ،، لما الشرطة خدت اجازة وضع عملنا لجان شعبية ،، لكن لو دولة حطت علينا تفتكر في بديل لدور الجيش ؟!
و لحد ما توصل إنت للحكم ممكن برضه تنفضلهم مؤقتاً ،، و دول سمهم مكسور اليومين دول بالدستور المعفن اللي حافظلهم وضعهم القانوني و المالي .

________________________________

. السلفيين كائنات مستأنسة و طيبة رغم إنها قوية و فتاكة ،، دول بيتبعوا أي حاكم ،، دول أحباب الله :) ،،
و حتى الخوف من دعمهم للعدو الأكبر الحالي "الإخوان" قل جداً بحاجات جت من عند ربنا كده من غير مجهود زي موضوع الربا و الشيعة و المستشار المرفود بتاع حزب النور ،،
دول ما تركزش معاهم قوي ،، لو ربنا كرمك و وصلت ممكن تاكلهم بكلمتين حلوين و طبق رز بلبن :)

________________________________

. الفلول الناس فاهماهم غلط ،، فاكرينهم "بيحبوا" مبارك و نظامه ،، الحقيقة إنهم كانوا "بيستفيدوا" من مبارك و نظامه بغض النظر عن الحب له أو الكره لغيره ،،
الفلول بقى ينطبق عليهم تماماً القواعد اللي تنطبق على "رأس المال" في نظريات الإقتصاد :
رأس المال (و الفلول برضه) جبان عشان كده يسعى إلى الأمان ، و يتحالف مع المنتصر ، و لا يتغابى مع القوي لإنه مش حمل قرار سياسي يقفله مصانعه أو يحبس ملاكه أو يفلسه بالضرايب !!
رأس المال (و الفلول برضه) لا دين له ، و كمان لا فكر له ، مشيها إسلامية و لا علمانية و لا ثورية و لا بتنجانية ملوش فيه ،، المهم السبوبة ماشية يبقى إحنا حبايب !!
عشان كده دول حلهم إنك تثبتلهم في معاركك مع الأعداء الآخرين إنك قوي ،، هتلاقيهم جايين يتمسحوا فيك و يعرضوا عليك أموالهم و أصوات عمال مصانعهم !!

________________________________

. عدوك الحالي الأكبر و الأخطر و الذي لا يمكن تحييده إلا بالقوة هو "الإخـــوان" ،،
الإخوان دول (وقت الثورة) كانوا عاملين زي الواد النتن قريب خطيبتك اللي مستنيك تقل مع أبوها في الإلتزامات المادية فيقوم هوا مزغلل عين الراجل بالهدايا و الوعود ، و متمحلس للبت بالنعومة و المصاريف عشان ينطر سيادتك و يشيل هوا الحتة بتاعتك !!
الواد النتن ده فعلاً قدر إنه يعمل كده و لف دماغ الراجل (المجلس العسكري) ، و الراجل أجبر خطيبتك (مصر) إنها تقبله (البرلمان) ، و شبكها كمان و عملوا الشبكة في قاعة و جابوا فرقة و زفة (الرئاسة) ، بس البت مزمزقة من شكله العكر و غباوته و سيرته الزفت و قررت إنها تفك منه و إن شاء الله أبوها يقتلها !!
حضرتك بقى قدامك إختيارات :

يا تشمت فيها و تقول هيا اللي تستاهل ، و يبقى لا إنت إتجوزت اللي بتحبها ، و لا اللي بتحبها خلصت من البلوة اللي هيا فيها ، وتعيشوا إنتوا الإتنين مكسورين ،،
يا تتمسكن و تقول ده نصيبي و تقعد زي خيبيتها تتفرج فييجي غيرك و يلطشها (فلول ، عسكر ، إنقاذ) ، و تعيش إنت هفية طول العمر قدام كل اللي عاشوا الليلة دي ،،
يا تضربلك صندوق بيريل و تقوم تمسك الواد إبن الصرمة ده تعلمه العفة ، فتبقى خلصت من بلوة في طريقك ، و خلصت من عدو مستقبلي بقى خايف منك ، و عملت بنط قدام الحتة بتاعتك فتقع أسيره لهواك و تعيش ديك البرابر و حبيب القلب :) :)

هتختار إيه يا برنس ؟!

________________________________

* ركز و إنت سايق ثورتك يا عم الثورجي الله يباركلك في عينك و عافيتك ،،
إوعى تفتكر إن الجدعنة هز كتاف ،، الجدعنة فن و فكر و أخلاق فمتصدرش العبيطة و شغل مخك :)
و إوعى تنشف دماغك في إنك تسافر من الطريق المكسر المضلم الطويل عشان ده إنت حاسس معاه بالأمان ، و تسيب الأوتوستراد الطلقة عشان إسمه خواجاتي مش مديك السينس بتاع الإنتماء :)
و إوعى تسلم الدركسيون لعجوز مش شايف المستقبل فيلف و يرجعك خمسين سنة لورا زي آلة الزمن و يدخلك في "نكــســة" جديدة !!





هناك تعليقان (2):

  1. للاسف كل اللي بكتشف انهم شايفين شوية الصورة بوضوح , مكتفيين بدور المحلل وبيجهو كلامهم لاشخاص خياليين معتقدين ان في حد هيسمعهم ويغير نفسه عشان قرا شوية كلام , الحقيقة محدش بيغير نفسه , ومحدش هيعمل اي حاجة من اللي انت قولته .

    ردحذف
    الردود
    1. منين جبت "مكتفيين بدور المحلل" دي ؟
      عرفت إزاي إنهم ما بيعملوش حاجات تانية ؟

      حذف