- المرادي هتكلم بالعامية ،، لأن الموضوع بسيط و محتاج
ناس ولاد بلد يفهموه ،، كمان انا عاوزه يوصل لفئة أوسع ،،
- مش هحكي في المحكي و أحلل
فكر الإخوان او تصرفاتهم ،، مش هقول رأيي فيهم و لا هقول لازم نعمل إيه ،،
هتكلم في مثال بسيط و عايز عليه رد ،، المثال زي ما
هو بسيط فهو محدد ،، فلو أمكن الرد يكون على نفس المثال ،، أو هضطر أخرج عن الكياسة
المعهودة :)
:
1 - إنت داخل عمارتكو لقيت راجل ماسك واحدة ست في المدخل و عمال يجعر
فيها و شكله كمان قرب يمد إيده عليها (مناوشات ما بعد الثورة بين
المجلس و الإخوان ) ،،
بصيت إنت
للبواب فقالك دول السكان الجداد ،،
خلصوا الخناقة
لما شافوك و خدوا بعضهم و طلعوا ،،
2- بعد كده و لشهور بقيت تسمع صوتهم ما بين خناق ،، و بين رقص و تطبيل
و يا سبعي يا جملي و كده يعني :) (قانون انتخابات الشعب ،
محمد محمود ، الجنزوري ، مفيش خرطوش ) ،،
3- عرفت إنت و إتأكدت إن الراجل جركوا الجديد ده حرامي و مسجل و ناوي
يقلب العمارة وكر ،،
فإستغليت
أول خناقة بينه و بين مراته و كان صوتها طالع بتصرخ في الشقة ،،
فإتلككت
إنت و قمت طالع كاسر عليهم الباب و جيت تشدها من تحت إيديه ( مسيرات تسليم السلطة للبرلمان)
فقامت هي بطلت صريخ و قامت ناتفاك قلم عدالة و قالتلك : "و إنت مالك يا بارد" ( علقة الشباب قدام البرلمان
و إحتفالات عيد الثورة) ،،
4- رجعت إنت زي المذهول و دخلت شقتك تفكر هتعمل إيه مع منصر الحرامية
اللي هيخربلكوا العمارة ده ،،
لقيت نفسك
أضعف من الزوج المسجل ،، و كمان مالكش أي مدخل تضرب بيه كرسي في الكلوب و تطفشهم هما
الجوز من العمارة (مراحل تحويل الصراع إلى صراع بين الإخوان و الثوار كاد الناس ان
ينسوا فيه العدو الحقيقي) ،،
5- بعد شهور من القرف و التحمل سمعت إنت خناقة بتسخن على يومين تلاتة
كده (ترشيح الشاطر و عمر سليمان ثم إستبعادهما فترشيح مرسي) ،،
فإبتدا الأمل
يجيلك تاني إن : يا إما الست قررت تخلع الحرامي ده ،، أو على الأقل فيه مدخل تطردوهم
هما الجوز !!
6- بعد الكام يوم خناق جت خناقة كبيرة و كان فيها ضرب و رمي عفش من
البلكونة و صويت ،، و لأول مرة جت الست تستغيث بيك !! (إنتخابات الإعادة ) ،،
فقمت إنت
ماسك الراجل المعفن ده إنت و الجيران و أكلتوه علقة علمته العفة ( عصير اللمون اللي غرق
جناين مصر :) )
7- الراجل بعدها حلف بالطلاق إنه ما هيديها مليم ، و هتخرج من الجوازة
و البيت باللي عليها (الإعلان المكمل) ،،
طبعاً لسه
كانت الشهامة واخداكوا فقمتوا قايلينلها : "و لا يهمك يا ست ،، رقابنا سدادة و
برضه هناخد حقك من عينيه"
و قمتوا
لامينلها فلوس و قومتوا محامي (إعتصام ما قبل نتائج الرئاسة) ،،
و الست وعدتكوا
إنها لو خلصت منه هتساعدكوا إنكوا تودوه في داهية و تطلعوه برا العمارة (رئيس وزراء و نواب من خارج
الجماعة ، إعادة المحاكمات ، الإفراج عن الثوار ، و خلخخلة الدولة العميقة) ،،
8- أول ما الست خدت حكم الطلاق للضرر و خدت العفش و المؤخر و إتحكملها
بنفقة (الفوز بالرئاسة) ،، عدت عليكوا شقة شقة و إدت كل واحد ملبس و كرملة ( الحلفانات في الميدان و
في الجامعة) ،،
و بعدين
قامت عاملة حفلة كبيرة في نفس ذات الشقة فيها أكل و شرب و طبل و زمر و ما عزمتش فيها
غير طليقها !!! (إحتفالات تنصيب الرئيس ، و القسم بوطنية العسكري ، و أوسمة القضاء
) ،،
و بقت يوماتي
داخلة خارجة مع سبع البرمبة و هما المفروض في العدة !!! (حفلات تخريج دفعات الكليات
العسكرية) ،،
9- من يومها و لكام يوم الست دي و لا عبرتكوا و لا رفعت تيليفون تكلمكوا
و لا حتى رمت عليكم السلام و عاملة من بنها !! ،،
10- الست دي دلوقتي ماسكة في خناق طليقها المسجل ده عشان عايزة تجيب
إخواتها يعيشوا في الشقة (مجلس الشعب) ،،
- الخناقة المرادي أشد من كل الخناقات اللي فاتت ،،
لكن المرادي الست ما طلبتش معونة حد من الجيران ،، و لا حتى عرفتكوا
إن فيه سبب المشكلة من اساسه ،،
و إنتوا مش متاكدين إذا كان الموضوع كده وخلاص ، و لا فيه في الأمور
أمور ؟! و لا دي حركة جديدة هما عاملينها عليكوا ؟!
**************
* هنا بقى هسألك السؤال
اللي في أول المقال :
- هل هتبقى "منطقي" و تعرف إن البشرية دي ما تستاهلش وقتك و جهدك فتنفضلهم و تعيش في حالك ؟؟!!
- و لا هتبقى "مجدع" رغم كل اللي حصل هتروح للست (من غير ما تمد إيدك) و تقولها برضه إحنا تحت امرك بس قوليلنا عايزة إيه
و إحنا نمسك إيده عنك ؟؟!!
- و لا هتبقى "ساذج" و تزيط زي العبيط
و ترجع تاني تلوش في الراجل المجرم ده و تعور نفسك عشان واحدة (عملتها معاك قبل كده) و حتى من غير هي ما تطلب و
يمكن حتى تقوم تهزأك زي ما حصل قبل كده ؟؟!
- و لا هتبقى "ندل" و تتحشر في الخناقة
شوية تفش غلك في الراجل و تديله بونية في الزحمة
،، و شوية تستغل المعجنة و تزنق في الست ؟؟!!
* إختار إنت مين في الأربعة
.
ليست هناك تعليقات:
إرسال تعليق