موقف ميكروباص الرئاسة: 2 سواقين ،، و 7 ركاب ،، و جو خنقة ،، و كوكتيل أمراض نفسية و إجتماعية !!

(رغم إختلافي في مع الصاوي في شأن إشتراكه في الإنتخابات في الجولة الأولى ثم مقاطعته و إنقلابه على النتيجة ،، إلا ان هذه الكلمات التي في الصورة في غاية البلاغة في تعبيرها عن الموقف)

( نــظــرية الــمــيكـروبـاص ) !!

http://www.facebook.com/ahmad.syiam/posts/10151448821120715

مصر الآن عبارة عن موقف و الرئاسة هي الميكروباص ،،

و فيه مشكلة إن اللي في الموقف كله ميكروباصين ،،

و الناس أمم ،، و في وقت الذروة ،، و كله يدفع اللي معاه بس يروح يتغدى و ينام قدام المروحة الفريش !

- ميكروباص ( شفيق ) :

و ده ميكروباص مخلع عمره 60 سنة ،، و شكله يقرف أمم كاملة ،، و سواقه سكران و أعور و شكله ما يتخيرش عن الميكروباص نفسه !!

* ده قرر يركب فيه ناس شبه السواق أساساً ،، و معاهم ناس ميقدروش أصلاً يفرقوا بين الميكروباص و الجاموسة العُشر !! فمش فاهمين الناس مش عايزة تركب معاهم ليه !!

___________________________________

- و ميكروباص ( مرسي ) :

و ده ميكروباص جديد و لسه بكيسه ، بس صيني !!

بيبرق زي كل العربيات الصيني بس عمره ما مشي عالأرض !

* لكن مش دي مشكلة الميكروباص الحقيقية ،، كل اللي بيفهم مستعد يجرب الجديد اللي شكله طبيعي عن ميكروباص الهلاك الأولاني !!

* مشكلة الميكروباص ده إن سواقه شديد الغطرسة و اللامنطقية !!

السواق ده هو "الجماعة" !!

البرنس مصمم يستغل حاجة الناس و يحمله ( أربــعــات ) ،،

و مصمم برضه ياخد الأجرة كاملة ،،

و آخر المتمة مصمم يروح من طريق غير خط سيره ،،

و المصيبة كمان مش عايز يقول على الطريق ،،

و بيطلب من الكل سماع كلامه بناءاً على أنه سواق (كفاءة) ،،

و أنه (صاحب العربية) !!

___________________________________

و هنا بقى تبان مصر الحقيقية التي يعرفها كل زبائن الميكروباصات الدائمين زي حالاتي :

* هتلاقي زبونين قاعدين في الكرسي اللي قدام ،،

غالباً بيبقوا معرفة السواق فحجزلهم الكرسيين اللي جنبه قبل الناس ما تهجم ،،

دايما ما بيشاركوش في الحوار لأنهم كده كده مش هتفرق معاهم أربعات و لا لأ ،،

و كده كده هيدفعوا نفس الأجرة ،،

و كمان واثقين في السواق لأنهم عارفينه فمش فارقة يروح من أنهي طريق !!

دول "الـسـلـفــييــن" :)

* و هتلاقي زبونة ( عجوزة ألاجاه كده شكلها إبنها مقدرش يوصلها فركبت ميكروباص ) قالت أنا هدفع تمن كرسيين بس هقعد في كرسي تلاتات مش أربعات ،،

الناس كلها بتحقد عليها لكن مش قادرين يعترضوا عليها عشان ست و كبيرة ،، و ما جاتش من كرسي يعني ،،

بس الكل بيقول في سره "حتى الميكروباصات هتبيعوا و تشتروا فيها الله يخربتكوا إنتوا حاسين بحاجة" !!

الست دي هي " المـصـريـون بـالـخـارج" :)

* في زبون هتلاقيه شاب ساكت خالص و ما فيش على وشه غير تعبير سعادة مش مفهوم أبداً مع إنه مزنوق جداً !!

الزبون ده هو "قواعد الإخوان الشعبية و محبيهم" ،،

*و مبسوط لإنه قاعد جنب بنت زي القمر عمال بيحاول يتعرف عليها من زمان "الأغلبية الطيبة المتدينة الكارهة للسياسة" ،،

اللي هي كمان ساكتة عشان ما بتحبش المشاكل و كمان مش عايزة تجرح مشاعر الشاب المثير للشك اللي جنبها لإنها "لسه" ما شافتش منه حاجة وحشة :)

* هتلاقي فيهم واحد أو إتنين معارضين بشدة و مش سايبين الميكروباص يمشي لو كان حمل بالفعل ، أو واقفين عالباب لو كان لسه ما حملش أربعات زي ما السواق عايز .

دول "الــثـورجـيــة" ،،

اللي المبدأ عندهم (الكرامة) أهم من المصلحة (التوصيلة) ،،

و هتلاقي الثورجي في الأول بيطلب إن العربية تحمل تلاتات ،،

و بعدين ممكن يستسلم شوية و يقاوح عشان الأجرة ،

أو يطلب ان السواق يمشي في طريق كل الناس تعرفه و متعودة عليه ،، و في الآخر لو فشل ما بيركبش !!

و إن كان و للأمانة أحياناً بيركب لما يبقى مفيش أي أمل إنه يروح غير في الميكروباص ده ،، لكنه برضه بيفضل يهدد و يتوعد طول السكة !!

* باقي الزباين هم الفئة الأسوأ في الحياة ،،

الفئة اللي دايما في صف القادر (و لو كان فرد واحد) ضد المنادي بالحق ( و لو كانت أمة كاملة )،،

الفئة اللي كل حياتها هي المصلحة (التوصيلة) و لا تهمها أبداً رفاهيات زي الكرامة !!

الفئة اللي دايماً بتبقى درع الظالم !!

الفئة الزبالة اللي هتقعد تكسر في مجاديف "الثورجي" اللي عايز ضمانات لكرامته ،، و ضمانات للطريق !!

- البداية بتبقى : "خليها عليك يا أخويا خلينا نروح" ،،

- و بعدين : "مش كده بقى ما الراجل معذور و جايلنا فاضي مخصوص و الجاز غلي" !!

- و تتطور إلى : " شوية عيال و مش حاسبين حساب أي حاجة ،، لو وراك أكل عيش أو عيال جعانيين ما كنتش إتنططت كده ،، عنك ما ركبت ،، سيبنا نشوف حالنا إنت مالك إحنا راضيين" !!

___________________________________

** صنف نفسك إنت أنهي راكب ؟! و ترضاها لنفسك و لا لأ ؟!

* أو إختار تكون معايا في فئة تفضل تمشي على رجليها ، أو تستنى ساعات في الموقف ،،

و لا إنها تركب ميكروباص الهلاك ،

و لا ميكروباص الخناق ، و التحرش ، و الأمراض النفسية !!

___________________________________

* أرجوك لو عندك أي إحترام للقيم النبيلة ما تحاولش تقتنعني أركب أي من الميكروباصين ،،

- لأني لا هسمع كلام حرامي أو واحد دماغة مشيسّة و أركب الميكروباص الأولاني !!

- و لا هسمع كلام واحد جاي يفرد نفسه أو يعمل فكيك عليا ،، و هوا معندوش جرأة يروح يقنع سواق الميكروباص الصيني إنه يبقى بني آدم طبيعي و يخلي عنده شوية إحساس !!

* و أن شاء الله نجيب خيمة و نعيش في الموقف "الميدان" ،،

أو نروح مشي على رجلينا في يومين "نبيع اللي ورانا و اللي قدامنا" ،،

و نقرر نعزل من البيت اللي في منطقة مفيهاش أدني كرامة إنسانية "نهاجر" !!

___________________________________

* مقاطع ،،،

فلن أولي مجرماً ،،

و لن أشارك في حفلة الزور و الكذب الجماعي !!