-
بصوا بقى و لو إني كنت مش ناوي أتكلم في الموضوع ده غير لما نخلص الهم اللي إحنا فيه
،،
لكن واضح إن الواحد لازم يتكلم في زمن كل الناس إمتلكت
فيه - بلا مبرر - حق التقدير و إبداء الرأي في كل شئون البشر في كل أنحاء الدنيا في
كل الأزمان !!
-
الكلام عن الثورة السورية ،، و اللي يزعل - سوري أو مصري أو هندي حتى - يخبط دماغه في حيطة التاريخ و السياسة و الدين مش في حيطة بروفايلي أنا !!
أنا هحكي عن اللي شفته بعيني و سمعته بودني و فهمته
بعقلي ، مش عن أخبار منقولة.
_______________________________
*
ثورة سوريا هي نسخة من ثورة مصر ،، كل العناصر متطابقة ،، الفارق الوحيد أن ثورة سوريا
إلى ثورة مصر هي تماماً مثل الفرق بين أتاري "صخر" و السوبر "بلاي إستايشن" !!
كل ما هنا ستجده هناك ،، لكن الفارق فقط في "حجم القوة" ،،
- هنا
كان حاكم ظالم لص فاجر دمر بلاده و إستعبد شعبه و أفقره و أجهله ،،
و هناك مثل ذلك تماماً لكن بصورة أقوى كثيراً ،،
عائلة الأسد عليها ثأر في كل بيت سوري تقريباً ،، ثأر
قتل أو تعذيب أو إغتصاب ،،
إحنا مبارك عملنا أمن دولة و مخابرات عشان يقمعونا ،،
هناك عندهم قسم البوليس بيعذب نفس
مستوى تعذيب أمن الدولة في مصر ،، و عندهم 13 جهاز مساوي "وظيفياً" لأمن الدولة عندنا ،،
و المواطن اللي يعتقل في واحد من الأجهزة دي لازم يلف
كعب داير على الباقيين ،، و كل واحد لازم يجود عن اللي قبله يمكن يطلع معلومة معرفش
يطلعها المعذب اللي سبقه !!
و طرق التعذيب في الأجهزة دي لا تخطر على بال بشر ،،
مش بس لقوة العنف ، لكن لقذارة التفكير ،،
تخيلوا إنهم كانوا بيجبروا الإبن يجامع أمه قدام المساجين
، يا إما يقطعوا اعضاؤه التناسلية و يجيبوله حد يغتصب أمه قدامه ، بعد ما يخيطوا جفونه
في حواجبه عشان ميقدرش يغمض !!
- هنا
خرجت مظاهرات فقمعها مبارك بالغاز و الخرطوش و القنص ،، و هناك خرجت مظاهرات فقمعها بشار بسيل الرصاص الحي في الوجوه من أول يوم و في كل المدن !!
و لثلاثة أشهر خرجت المظاهرات بلا سلاح ، ثم لشهور
إستخدموا الحصى و العصي ، ثم بعد ذلك حصل الثوار بدورهم على السلاح ، الذي كان موجوداً
في بلادهم بكثافة أصلاً ،،
جدير بالذكر أن "الآلي" في سوريا قبل الثورة
كان بقيمة 200 دولار و بعد الثورة وصل إلى
1500 دولار !! يعني عكس اللي عندنا
تماماً ،، ده رد على الأخ اللي بيسأل : "طب هما جابوا أصلاً السلاح في الأول منين" ؟
- هنا
حصل إنفلات أمني فعملنا لجان شعبية بالسكاكين ،، و هناك برضو عملوا لجان زيها بس بسلاح
"رجالي" شوية !
- هنا
الثوار لما كانوا يمسكوا عسكري زمان أو خروف دلوقتي بيعلموا عليه ،،
هناك لما بيمسكوا عسكري بيدوله فرصة يتوب و
ينضم ليهم ، و يا ما ثوار ماتوا و هما بيأمنوا إنشقاق عساكر رابطهم بشار في الدبابات
بجنازير عشان ميقدروش يهربوا و يضطروا يقتلوا كل اللي قدامهم !
لكن لو العسكري المقبوض عليه نشف دماغه و تمسك بولاؤه
لبشار - و دي عمري ما شفتها الحقيقة - بيضرب بالنار ،،
و ده أقل واجب على فكرة في مقابل الجرائم اللي هوا
إرتكبها ،، كلامي هنا للأخ المظلظ اللي مش عارف يعني إيه حرب !!
- هنا
الثوار لما بيطولوا بلطجي بيضربهم مع الأمن المركزي ، أو بيعمل عليهم نمرة و يسلمهم بيعملوا معاه
السليمة ،،
هناك لما بيمسكوا "شبيح" كان بيدبح ولادهم
قبل تحرير المدينة أو بيرمي الشرائح اللي بتحدد مكان القصف لميليشيات بشار بيدبحوه
هما كمان !!
و أحياناً بيصوروا دبحه عشان يبقى عبرة للشبيحة اللي
لسه ما تقبضش عليهم عشان يبطلوا أذية في الناس ،،
فيها حاجة دي ؟ حضرتك ليك إقتراح تاني ؟! كنت تحب مثلاً
يضربوه على ضهر إيده بالمسطرة ؟؟!!
- هنا
كان في أحياء تم تجنيدها معنوياً لقمع الثوار (العباسية و عابدين) ،، و ثوارنا كان مستبيحين ضربهم لأنه في الحقيقة كان صد إعتداء مش عدوان
إبتدائي ،،
هناك بقى النظام مجند قرى كاملة و مسلح أفرادها بمدفعية و أسلحة قنص عشان يقصفوا القرى اللي حواليهم اللي فيها ثوار و يقنصوهم من على الطريق
و هما معديين ،،
دلوقتي لما الثوار بقى معاهم مدفعية بقوا بيقصفوا القرى
دي عشان يوقفوا القصف اللي قتل منهم و من الشعب عشرات الألوف ،،
فيها حاجة دي ؟ كنت تحب مثلاً إن الثوار يروحوا للناس
دي بإتنين كيلو فاكهة و ياخدوا معاهم شيخ القرية و يعملوا قعدة عرب و هما لسه بيقصفوا
القرى اللي حواليهم كل ساعة ؟؟!!
- هنا
إحنا بيتحط على الأحياء اللي فيها ثوار بالغاز و الخرطوش(زي ما حصل في المحلة
و المنصورة و إسكندرية) ،،
هناك بيتحط على المدن اللي يشتبه في وجود ثوار فيها
بالقنابل الفراغية (المفنية للبشر و المباني بسحب الأوكسجين من منطقة كاملة) ، و الصواريخ و القنابل القذرة (المليئة بكسر الحديد لإحداث أكبر إصابات بشرية ممكنة) ،،
- التركيبة
الثورية و الفلولية زينا بالمللي لكن برضه مع فروق "نوعية" :
.
عندهم ناس فاهمة و ناس مضحية ،، و دول على
قلتهم إلا أني أكن للكام شخص اللي قابلتهم بالشكل ده أكبر إحترام إستحقه شخص في حياتي
،،
راجل موزع ولاده على البلاد لتوزيع الإغاثة و فاتح
بيته مطعم للثوار و ملجأ للي إتكسر بيته و باقي اليوم مطوع في المستشفى !! ده حبيبي
"أبو عبده الضلع" ،،
و واحد سايب وظيفة جبارة في النظام السوري و منصب في
الأمم المتحدة و سايب أسرته في أوضة من غير حمام مع إنه إبن عز و له بيت يرمح فيه الخيل
، بس عشان يشيل سلاح و يأمن مرور المعونات الطبية من خلال الكمائن الثابتة و المتحركة
و حقول الأغام بين البلدات المنكوبة !! و ده حبيبي "زكريا أبو غياث" ،،
و مليون واحدة رافضة تاخد مهر و ترفض كل اللي يتقدملها
، و توافق بس إنها تجوز بطل ثائر محارب بدون مليم واحد و تشيل بيته في أسابيع الغياب على الجبهة و تستنى
كل ساعة خبر إستشهاده !!
.
و عندهم برضه زي عندنا ثوار بلا عقول ،، من النوع اللي مهما تفهمه هوا متبرمج على كلمة واحدة "أنا ملعبش سياسة أنا
بتاع ثورة" حتى لو بتكلمه عن مفاوضات
مع ثوار تانيين، أو متبرمج على فعل واحد "إحنا نحشد و نعتصم و
نحط عالداخلية" حتى لو بنتكلم إن مشكلتنا
دلوقتي مثلاً مع المجلس العسكري !!
النوع ده عندهم بقى غير عندنا ،، النوع ده عادة بيوصل
بسرعة لمراكز قيادية ، و ده طبعاً طبيعي لأن في الجو بتاعهم ده هيبقى البقاء "للأعنف"
!!
تخيل نفسك بتكلم "قائد لواء" هناك و بتكلمه في أوليات و بديهيات عسكرية زي قواعد التنشين أو تداول
السلاح أو تنظيم نوبتجيات للجنود أو توزيع مضادات الطائرات جغرافياً على مساحة البلدة
، يقوم باصصلك و مندهش كأنه بيسمع خطة روميل في حرب العلمين !!
الفرق إن النوع ده من الثوار عندنا بيبقى معاه مولوتوف و كبيره بيكون معاه فرد خرطوش ،، لكن صاحبنا هوا هواه اللي في سوريا بيكون معاه راجمة صواريخ و مدفع نص بوصة !!
.
و عندهم كمان زينا ثوار "ملظلظين" سلميين بيقولوا إنهم بيكرهوا
العنف مع إنهم مش شايفين حل تاني لمجرد إنهم خايفين من شيل السلاح !!
و الواحد من دول غالباً بيبقى عايش على الفيسبوك في بدروم بيتهم أو في قرية في تركيا و بالليل بيكروز
بالعربية مع إصحابه !!
.
و عندهم برضه فلول ، و عندهم برضه كنباوية ،، و تقريباً بنفس النسب اللي عندنا و بيستخدموا نفس الأكليشيهات اللي بتخرج الثوار عن شعورهم هنا !!
بس الفرق إنهم هناك بيتكلموا في كمهم من الخوف لإن
اللي قدامهم مش شايل "بانر" و بيهتف ،، لأ شايل "آلي" و نفسه يستخدمه !
.
عندهم برضه سلفنجية زي اللي عندنا بالظبط
،،
زي ما اللي عندنا إفتكروا إن فيه ثورة في شهر خمسة و عملوا جمعة قندهار
عشان يطالبوا بتطبيق الشريعة ،،
سلفنجيتهم برضه إلتحقوا بالثورة متأخر جداً بإسم الدفاع عن المسلمين من ذبح النصيرية
،، و دلوقتي برضه إفتكروا يطالبوا بتطبيق شرع الله ، و متوعدين هما بقى الناس بالذبح
لو رفضوا إقامة شرع الله بعد بشار !!
الإختلاف
بين سلفنجيتنا و سلفنجيتهم هوا إختلاف "كمي" ،،
الكهنوت موجود هنا و هناك بس هنا ممكن تتشتم عشان قلت كلمة في محمد حسان ، هناك
ممكن تتقتل لو قلت كلمة على أبو مصعب السوري !!
هنا ممكن
يبقى السلفنجي فاهم شوية و دارس و يقولك كام
لفظ منمق زي مثلاً "المشروع الإسلامي" و يناقشك في شوية تفاصيل في السياسة الشرعية ، هناك مفيش رد غير : "و قاتلوا المشركين كافة" !!
و السلفي المصري ممكن يكون قاري كتابين عن الولاء و البراء و لا حاجة ، و سامع عشرين تلاتين درس عن فضل اللحية و النقاب و عذاب
القبر ، لكن السلفي "المستجد" السوري 60% هيفشل إنه يقولك أركان الإسلام الخمسة ورا بعض بالترتيب ،، و هتلاقيه بعد شوية نقاش مطلع يعزم عليك بسيجارة :) و ده عن تجربة مش إفتراء على فكرة - طبعاً بإستثناء الكتائب التي تتبنى
فكر القاعدة ، و كتائب مجاهدي الشيشان و الأتراك- !!
هنا و هناك
السلفي لازم يتعمد إغاظة كل الآخرين ،،
زي ما هنا بيشوش عليك بكلمة "تكبيييييير" ، هناك تقوله "ثورة" يقولك إستغفر ربك إنت لو مت دلوقتي تخش النار لسوء نيتك ، قول "جهاد" !! و كأن مينفعش إن الجهاد يكون في شكل ثورة أو إن الثورة على الظلم
تعد جهاد !!
ترفع صباعين بعلامة النصر "فيكتوري" يرفع صباع واحد و يقولك لا إله إلا الله وحده لا
شريك له ، إنت هتكفر ؟!!
و دول برضه زي عندنا : بتمولهم السعودية و الجمعيات السلفية في مصر !!
. و أخيراً : عندهم إخوان برضه هناك !! الإخوان القدامى
في سوريا يتعدوا على الصوابع ،، لكن "المتأخونين" الجدد و "المحبين" موجودين بكثافة ،،
كائنات لزجة ، عديمة النخوة لا تحمل السلاح ، مبتسمين
إبتسامة نتنة و مبرراتية و مستفزين و منافقين و متذاكيين في حين إنهم متوسطي الذكاء
!!
يعني نسخة طبق الأصل من اللي عندنا ،، و هتلاقيهم شغالين
في الأنشطة المسيطرة على المجتمع :
المعونات
الإغاثية ،، و توصيل المدد التسليحي !!
و ليهم هناك ميليشيات بيدعمها الإخوان ،، ميليشيات
لا تحارب بشار تقريباً ،، كل مهمتها هي مهمة الشرطة في الإستعراض ، و التنطيط على خلق الله بدعوى حفظ الأمن ،، و كمان
بيسيطروا تقريباً على كل المعابر الحدودية !!
شغل يهود إخوانجية على أبوه !! و دول بقى محضرينهم
إنهم يكونوا الذراع المسلح اللي هيجبر المجتمع السوري على إختيار الإخوان بعد بشار
، برضه عشان (هما أقوى فصيل منظم يقدر يقف في وش الدولة العميقة و الفلول) !!
و دول برضه
زي عندنا : بتمولهم قطر !!
- إحنا
شعب أمي جاهل و متخلف حضارياً ،، و هما أنيل مننا شويتين
(
و دي الحقيقة كانت مفاجأة كبيرة لي لتصوري المسبق بأن الثقافة أصيلة و العقول اكثر
ألمعية في بلاد الشام عن باقي بلاد العرب من نوعية من قابلت من الشوام في جزيرة العرب)
بشار ضرب عليهم أربع ظلمات :
-
ظلمة دينية : بتمكين بهاليل الصوفية من الوعظ و الإفتاء ،
-
ظلمة علمية : بتعريب العلوم فحرمهم من فهم أي
بحوث حديثة أو حضور مؤتمرات ،
-
ظلمة سياسية : بتجريم الكلام في السياسة حتى و
لو بمدح النظام نفسه !!
-
ظلمة إقتصادية : بتطبيق نظام قذر من الإشتراكية
الشعبية رغم الرأسمالية النخبوية !!
الظلمات الأربع أدت إلى أمية عقائدية و علمية و سياسية
و إقتصادية !! يعني أجهل مننا بمراحل !!
- إحنا
شعب فيه أمراض إجتماعية و إنسانية موديانا في داهية من أول الأنانية ، كره التنظيم و إنعدام
روح الفريق ، تحقير العلم ، إستمراء العبودية للحاكم ، العنجهية الفارغة ،،
هما بقى شعب نسخة طبق الأصل منا بس بفروق بسيطة ألخصهملك
في جملة واحدة بإن هما فيهم :
"البرود
والعنف و الخيانة الجبلي" بدل "الهمبكة والفكاكة و الخسة الفلاحي" بتاعتنا !!
- إحنا
حكمنا إخوان رغم إن كل منطق سوي كان يقول إنهم مستحيل يستحقوا ده لخيانتهم للثورة و
إنعدام كفائتهم ،،
و هما كمان كإنهم مستنيين يلبسوا نفس الخازوق بعد تونس
و مصر ، و منتظرين حكم الإخوان بنفس الرؤية و الحجج الغبية اللي كنا بنسمعها من رجل
الشارع المصري بعد الإستفتاء (دول بتوع ربنا
،، دول إتظلموا كثير ،، إدوهم فرصة) !!!
_______________________________
* بالنسبة
بقى للأخ المتطاول اللي قاعد على .... و لا بلاش مشيها : اللي قاعد على الكنبة قدام "قناة المحور" و بيقيم أداء المسافرين للجهاد في سوريا من اللي ليهم جنسيات تانية ،،
-
أخينا "الأجوف" ده زيه بالظبط زي الكنابويين في ثورتنا مع إنه عايش دور الثورجي هنا
!! إزدواج شخصية لا يمكنك أن تراه مرتين لندرته !! لا تخرج قبل أن تقول سبحان الله !!
.
شوية يقولك : "إيه اللي وداهم هناك"
؟!!! و يتعصب قوي لو سمع كنباوي بيقول كده عن
ثائر من المحلة إتقبض عليه في إسكندرية !!
.
و شوية يقولك : "دول مضحوك عليهم" !! يعني واحد رايح مضحي بماله و حياته محسبهاش كويس و الفكيك أبو ...
ده هوا اللي جاب قعر الموضوع و فهم الزتونة !!
.
و شوية يقولك : "دول إرهابيين و
بيقتلوا في الجيش العربي السوري" !! مع إنه بيرفص لما يسمع حد يقول على ثائر إنه بلطجي لأنه بيضرب في
الأمن المركزي !!! طيب ما ده كلب الظالم و التاني برضه كلب الظالم يا مدب !!
.
و شوية بقى يجيبلك الخلاصة و يقول : "طيب ما كان راح يجاهد في فلسطين أحسنله" !! طيب و إنت مال أهلك يا فكيك ؟! طيب ما تروح إنت فلسطين !! و لا إنت
شغلتك في الحياة "بق" و بس و كل مهمتك إنك توجه الأبطال الحقيقيين و تقيمهم
؟!
تفرق إيه إنت بقى يا عم الثورجي عن الكنباوي اللي حرق
دمك ميت مرة قبل كده لما تقمص دور "الي مشغل اللي خلفوك" أيام ما كنا بنحط الداخلية بعد مذبحة بورسعيد و قام قايلك :
"ما
تتظاهروا عند النائب العام ما هوا اللي بيصدر أوامر القبض و الإحالة للمحاكمات"
؟؟!!
.
تفرق إيه إنت بقى يا عم الثورجي عن المواطن الغبي اللي كان بيعدي
علينا الصبح أيام محمد محمود و مجلس الوزراء و يشتمنا لأننا كنا السبب إن فيه شقة أو محل ولع ، مع إنه عارف
كويس إن اللي مولع فيها هيا الداخلية بقنابل الغاز المضروبة غلط ؟!
ما إنت كمان عمال تتشحتف على البيوت اللي بتدك في سوريا
و بتحمل المسؤولية للثائر المستخبي جنبها مش للنظام اللي قصفها بالطيران !!
- كلمة
أخيرة بس ،، بما إنك فهمت فحاول متكررش نفس الغلط تاني ،، كل المطلوب "شوية دم" و تخليك في "أم ثورتك"
اللي مش عارف تخلصها دي بدل ما تتنطط على ثورات
خلق الله اللي أرجل منك !!
_______________________________
* تعلالي
بقى هنا يا برنس يا للي فاتحها عالبحري شتيمة في عنف ثورة سوريا مع إنك ثورجي هنا في
مصر و قولي :
-
لو لقيت ثورة في ناس ركبوها و عملوا مصايب زي حرق الكنائس مثلاً اللي حصل عندنا ،،
أو ناس إندست فيها و حرقت مباني عامة ملهاش علاقة بالأحداث زي المجمع العلمي ،،
تقوم سيادتك نشتم الثورة ؟ و لا تلعن سلسفيل جدود الراكبين و المندسين ؟!
إنت دلوقتي بتقع في نفس الغلطة اللي بيقولها "المواطنين الشرفاء" : (الله يخربيتهم خربوا البلد) !!
الراجل اللي بيفهم يا برنس لما ياخد موقف من ممارسة
بعينها ،، ما ياخدش ثورة بحالها بذنب الحاجة اللي هوا شايفه غلط ،،
اللي بيفهم بيقول رأيه في الممارسة نفسها و في اللي
بيعملوها ؟! طبعاً لو كان متابع و فاهم مش بيطجن و السلام !!
-
لكن سيادتك لا مؤاخذة هتاخد على دماغك لو كنت بتشتم للسبب اللي أنا فاهمه ،، نفس السبب
اللي بيخلي كل "جبان" لكنه "قليط و شايف نفسه"
يشتم في الثورة المصرية ،،
هوا جبان عشان كده بيخاف ينزل ،، لكنه عشان شايف نفسه
فلازم يظهر إنه أحسن من اللي بينزلوا ،، يا إما لأنه "هو حكيم" و فاهم أكثر منهم ،، أو لإن "هما بلطجية و قابضين" و هوا مش معقول يوسخ إيده مع ناس زي دي !!
سيادتك برضه ياللي بتشتم ثورة سوريا بتعمل نفس الحاجة
مع إنك بتكره صاحبك اللي بيعملها هنا ،،
جبان أو كسلان إنك تسافر تحارب أو حتى تساعد من بلدك
،، بس عشان صورة جيفارا اللي إنت راسمها لنفسك قدام الناس ما تبوظش فلازم تسفه و تخون
الثورة اللي إنت مش ناوي تساعدها !!
-
مش هينفع تعملي فيها جيفارا هنا في مصر و إنت في نفس الوقت بتشيطن ثورة سوريا أو ثورة البحرين ،،
حتى و لو إختلف شكل الأداء الثوري ففي كل الحالات هي
ثورة شعب على حاكم ظالم قاتل لص خائن أفقر و أمرض وجهل و قمع شعبه ،،
موقفك من الثورات لازم يكون متسق مع بعضه ،،
لو مش عشان أخلاقك و ضميرك يبقى عشان صورتك قدام الناس
يا أخي !!
هيبقى شكلك عبيط قوي لما تاخد موقفين مختلفين من ثورتين
متطابقتين تقريباً !!
- بص
يا سيدي ،، يمكن تكون نزلت هنا في الثمانتاشر يوم اللي فلقوا دماغنا
بيهم ،،
يمكن تكون قائد مجموعة لسه بتعتصم في الميدان ،،
يمكن تكون حتى رئيس المكتب السياسي لحركة ثورية ، لكن رغم ده كله مش فاهم يعني إيه ثورة فسيبني أعلمك :
الثورة مش أشخاص "نشطاء" ، و لا مكان "ميدان" ، و لا أحداث "فعاليات"
و بس ،،
الثورة قبل ده كله "فكرة" و "فكر" ،، و الإثنين دول
من ثوابت التاريخ و رأي سيادتك فيهم ملوش أي تلاتة لازمة !!
"فكرة"
الثورة هي الإصلاح الفوقي بخلع نظام و إحلال نظام
جديد ،، و في سبيل ذلك تستخدم الوسائل المتاحة لكل مجتمع و توقيت و خلطة سياسية و أمنية
،،
و "فكر" الثورة هو التغيير الراديكالي - الجذري - المستعد للمواجهة العنيفة مع الخصوم ،
و الإنحياز لقيم الثورة فقط و لو على حساب النفس ،
دون تأليه لا لشخص أو موروثات قديمة ،
و عدم التسليم للخصم أو التفاوض على أهداف و مبادىء الثورة
حتى و لو لآخر رجل !!
لو سيادتك مهما كان حجم و كثافة منتجك الثوري مش فاهم
ده ، فرجاءاً يا تتعلمه ، يا تحرمنا من طلتك البهية و آراءك اللوذعية !!
-
و بلاش عشان خاطر ربنا الفتي و الأفورة و الفكاكة اللي قاتلاك دي ،
مش لازم تعملي فيها إنك سي آي إيه ، و سي إن إن ، و أمم متحدة ، و منجم فلكي ، و محلل نفسي في نفس ذات الوقت !!
يا تكون على قد الحدث معلوماتياً و سياسياً و أخلاقياً ، فتبتدي تدلي بدلوك و تقول رأيك
،
و بعد ما تكون رأيك و من باب إحترامك لنفسك تروح تطور الرأي ده لواقع عملي بمساعدة اللي إنت شايف معاه الحق ،،
يا إما تعيش حجمك و تهتم بشؤونك ،
و أهو بكده حتى مع إنك ما ساعدتش فإنت على الأقل كفيت
أذاك عن خلق الله !!
* "الحياء" هو كلمة السر ،، إحترم نفسك و إتكلم على قدك ،،
لكن آه صحيح أنا اللي نسيت ،، ما اللي
إختشوا ماتوا !!
__________________________________________________
إقرأ أيضاً :
(هل ولاؤك لحدث الثورة أم لحراكها أم لنشطائها أم لفكرتها
و فكرها ؟)
(السيناريو الأسود للقضية السورية)
ليست هناك تعليقات:
إرسال تعليق